March 02, 2010 - P7.6M gigahin alang sa Honorarium sa mga BHW, CVOs, BNS, Daycare Workers.

P7.6M gigahin alang sa Honorarium sa mga BHW, CVOs, BNS, Daycare Workers.

Mokapin sa P7.6M ang gigahin sa Sangguniang Panglungsod sa dakbayan sa Ozamiz alang sa Honorarium sa mga sakop sa Barangay Health Workers (BHW), Civilian Volunteers Organization (CVO), Barangay Nutrition Scholars (BNS) ug Daycare Workers alang sa tibuok tuig 2010.

Sa committee hearing sa Committee of the Whole sa session hall sa konseho kagahapong adlawa, gipasabot ni Vice Mayor Kaloy Bernad isip legasiya sa sangguniang panglungsod, makatarunganon nga gahinan sa lokal nga kagamhanan ang paghatag og honorarium sa mga lumilihok sa mga barangay nga nahisgutan nga unahan kinsa nahimong kaabag sa goberno sa paghatod sa batakang serbisyo.

Ang BNS ug daycare workers honorarium una nang gilakip sa regular budget ug agig dasun, gisunod ang honorarium alang sa mga BHW ug CVO nga mokabat sa P3.8M, gikaltas gikan sa mokapin sa P28M nga gahin alang sa pagbayad sa utang sa pagtukod sa Public Mall ug dogang P1.9M gikan sa infra-projects sa OCTAVS.

Gipasabot sa Besi Mayor ug sa mga sakop sa konseho nga dili maayo paminawon sa katawhan ning siyudad nga ang halos katunga sa 20 percent development fund nga mokapin sa P58M igahin alang sa pagbayad sa utang sa Public Mall nga unta ang tipik og bahin niini mahimong kabayran sa kinitaan gikan sa pagpadagan sa nahisgutan nga economic enterprise.

Ang pagpasabot sa Besi Mayor giuyonan nila ni Konsehal Bebei Neri, Loloy Cartajenas, Dodong Saquin, Bobby Jimenez ug Taryn Mecaros.

Una nang gibutyag sa Besi Mayor nga ang siyudad nagpamatuod sukad pa niadtong 1992 hangtod karon, sa pagpa-ila sa kabandihanon sa tampo sa BHW, CVO, BNS ug Daycare Workers kinsa naghago alang sa pagpalig-on sa kahimsog, kalinaw ug pasiunang maayong pag-umol sa kabataan s matag barangay ning siyudad busa maningkamot gayud ang siyudad nga makahatag og pasalamat-pahalipay pinaagi s paghatag og honorarium.

Gisubli sa Besi Mayor nga dili usa ka politico ang naghatag og honorarium sa maong lumilihok sa barangay kay ang tinuod mao man ang lokal nga kagamhanan sa dakbayan sa Ozamiz. (Nanding G. Dumanhug, Office of the Vice Mayor. )