PROGRAMA UG PANGLANTAW NI VICE MAYOR KALOY BERNAD

PROGRAMA UG PANGLANTAW NI VICE MAYOR KALOY BERNAD



Pamahayag:

SI KALOY-NOYNOY UG MAR mihan-ay og programa nga mosulbad sa kapobrihon sa Misamis Occidental nga gitawag og “PAGBATI”

Kini nga programa nagsukad sa kinahilabmang bahin sa sensiridad, konsepto, pagtuo ug panlantaw nga makatabang sa paghaw-as sa katawhan sa lalawigan nga nag-antos sa kapos nga kapobrihon.



Ang “PAGBATI” nagkahulogan og Pagpalambo sa produksiyon sa panguma-

pagproseso ug panginabuhi,

Balansing ekolohiya ug edukasyon,

Torismo-negosyo-pamohonan ug batakang serbisyo,

Inprastrakturang kahimanan.

Ang Misamis Occidental ginasahan sa Dios nga may 1,939.32 kilometro kuwadrado sa kinatibuk-ang gidak-on sa kayutaan diin nahimotang sa Amihanang Kasadpang Mindanao nga sa utlanan nga bahin niini anaa ang tulo ka makasaysayanong baybayon nga mao ang Panguil Bay, Murcielagos Bay ug Iligan Bay ug sa iyang luyong bahin niini, anaa ang nagbuntaog nga talay sa Bukid Malindang ug Bukid Amparo. Kini nga kamognaan sa Dios maoy naghatag og gasa sa kinabuhi sa tanang kabuhatan sa lalawigan.



PAGPALAMBO SA PRODUKSIYON SA PANGUMA UG PAGPROSESO

Ang atong lalawigan panguma ang dugokan sa ekonomiya nga may gidak-on sa iyang yuta pang- agrikultural nga moabot sa 118,933 hektaryas. Kabahin niini adunay kidak-on nga 13,861 hekataryas, gitamnan og mga lagutmon, 6,831 hektaryas ang kahumayan, 101,784 hektaryas ang kalubihan, 16,800 hektaryas kamaisan. Kini nga gasa sa kamognaan maoy maghatag kanato og walay kataposan nga kahigayonan sa paglambo pinaagi sa pagpadas-ag sa atong abot o produksiyon.

Ang kagamhanan kinahanglan gayud nga molambigit sa pagpalambo sa produksyon pinaagi sa paghatag og epektibong tabang teknikal ug pinansiyal.
Ang gobernong lokal mahimong mopalit, moabang o makigsabot alang sa partnership nga kasabutan aron makabaton og yuta o uban pang kahimanan alang sa pagpalambo sa atong produksiyon sa panguma.

Ipaasdang ang organic farming aron mukunhod ang gasto sa panguma, makatabang sa pagpasig-uli sa naumaw nga kayutaan ug kinaiyahan.

Ang pagproseso sa atong taas nga abot sa panguma makamogna og oportuyinidad sa panarbaho, pagtaas sa kinitaan sa katawhan, pag-usawag sa ekonomikanhong kahimtang sa matag pamilya, seguridad sa egong das-ag sa pagkaon, lig-on nga kahimsug sa matag banay ug dili lisod nga pagpaeskuwela sa kabataan.

Gumikan sa maayong kayutaan, palibot ug tubig sa atong mahal nga lalawigan, mabuhi ug mapasanay ang mga kahayopan sama sa carabao, baka, baboy, kanding, kabayo ug sa atong katubigan mahimong mopasanay og ulang, pansat, alimango, bangus, laya, pugapo ug uban pang matang sa isda ug buhi lamang dagat,

busa; ang Panguil Bay kinahanglan nga panalipdan ug palahutayon.

Kini nga gihisgutan sa unahan nga mga rerskursos naturales mahimong padaghanon ug prosesuhon aron makamogna og panginabuhi, mopataas sa kinitaan sa katawhan sa lalawigan.

Pagpahigayon og subsub nga skills training aron mapalambo ang kaantigo ug kahibalo sa atong kusog pamuo pinaagi niini makatrabaho sa sulod o gawas sa nasod; aron mas mahimong epektibo, ang kagamhanang lalawigan o lokal mismo ang magmogna og programa alang niini nga pagatawgon og
“Work Now Pay Later” Employment Placement Program.

Aron mahimong lig-on ang programa, magtukod ang kagamhanang probinsiyal og skills training complex alang sa massive skills training program.


Balansing ekolohiya-

Ang Bukid Malindang, Amparo, Panguil Bay, atong kagulangan, kanipaan,
kayutaan, suba, sapa ug kahanginan kinahanglan nga dili gusbaton hinuon panalipdan, palambuon ug palahutayon kay kini mao ang atong kinabuhi ug kaugmaon.

Atong gikinahanglan nga ipatuman ang mga balaod nga nanalipod, mopalahutay sa atong palibot.

Mas ipadayon ug palambuon ang mga programa alang sa pagpahibalik sa atong nadaot nga palibot.

Massive reforestation and pollution control program sa hangin, kayutaan ug katubigan ilabina nga daghan kaayo ang nagpakabuhi sa Panguil Bay.



Edukasyon-

Kini giisip nga yawe sa paglambo, usa ka tahas nga tambayanongan tali sa matag pamilya ug kagamhanan aron mahatag ang katungod sa katawhan alang hustong edukasyon. Apan kinahanglan gayod nga palig-onon ang ekonomikanhong kahimtang sa matag pamilya aron makaangkon og maayong edukasyon ang katawhan.



Torismo-

Ang lalawigan dato sa kasaysayan nga giisip nga kini usa ka bahandi. Ang mga dapit sa lalawigan ug ang katawhang Misamisnon kabahin sa kasaysayan gikan sa unang pagbutho sa sibilisasyon ngadto sa bag-ong henerasyon.

Tungod niini daghan dapit sa Misamis Occidental nga makasaysayanon nga makaingganyo sa torismo.


Negosyo-Pamohunan

Ang pagpadas-ag sa atong ani, pagproseso sa atong abot, pagpalambo sa torismo, makamogna og negosyo, makapadani sa lokal ug langyawng negosyante. Kini nga kahigayonan makamogna og oportiyunidad sa panarbaho.

Dili lisod ang paghatag og batakang serbisyo sa katawhan sama sa serbisyo alang sa maayong panglawas, peace and order, sanitations ug uban pa kon adunay saktong resources ang katawhan, gumikan kay kon taas ang kinitaan sa katawhan, motaas usab ang makolektang buhis sa goberno nga maoy gamiton sa paghatod sa batakang serbisyo sa katilingban.











Inprastrakturang Kahimanan-

Ang pagtukod ug mga inprastraktura kinahanglan nga may kalambigitan sa atong mga tinguha ilabina ang pagpalambo sa atong produksiyon ug pagproseso sa atong abot.

Kabahin niini ang pagbuhat ug mga road-networks sa kabukiran, water system, alternative source of power sama sa solar and wind energy ug uban pa.

Kini tipik ug bahin lang sa atong plano ug panglantaw aron mahaw-as ang lalawigan gikan sa talay sa mga probinsiya nga gigapos sa kawad-on.

Sa ngalan sa pag-alagad sa Dios ug sa Katawhan,




Kaloy Bernad