4 pesos nga pletihan sa pedicab, giaprobahan sa ikaduhang pagbasa sa Konseho

4 pesos nga pletihan sa pedicab, giaprobahan sa ikaduhang pagbasa sa Konseho

Giaprobahan sa ikaduhang pagbasa sa Sangguniang Panglungsod ang ordinansa nga magpaumento og usa ka peso sa minimum nga pletihan sa pedicab ning siyudad.

Sa regular session sa konseho, giduso ni konsehal Bobby Jimenez, chairman, Committee on Public Utilities ug hiniusang giuyonan sa tanang sakop sa konseho ang ordinansa nga nag-amenda sa Section 1 City Ordinance Number 1003-05 nga unod niini ang pagtaas sa minimum nga pletihan sa pedicab gikan sa 3 pesos ngadto sa 4 pesos.

Gipasabot ni konsehal Jimenez ang baruganan sa sangguniang panglungsod nga ilang ihatag ang gipangayo nga increase sa pletihan sa pedicab gumikan kay kini usa ka sakyanan gamit ang kusog sa tawo apan kinahanglan usab nga ilang ihatag ang maayong serbisyo sa publiko.

Iyang gidogang nga kon mapakyas ang mga tigmaniho sa paghatag og maayong serbisyo ug pagsunod sa reglamento sa pag operate og pagmaneho sa maong sakyanan andam usab ang sangguniang panglungsod nga I recall kun bakwion ang umento sa pletihan.

Kini dason sa panglantaw ni Vice Mayor Kaloy Bernad nga kinahanglan masulbad ang problema sa kolurom nga pedicab ug pagmaneho niini nga walay lesinsiya.


Kahinumdoman nga ang konseho nagpahigayon ug sunod sunod nga public hearing kaniadtong Mayo 27 ug Hunyo 1, 2009 agig pagtuman sa gimando sa balaod.

Gidahuman nga ang nahisgutang sugyot ordinansa aprobahan sa ikatulo ug kataposang pagbasa sa sunod regular session ug himuon ang publication sa pamantalaan sa dili hingpit nga ipatuman.

Ang regular session kagahapong adlawa gidumala ni Konsehal Bebie Neri isip presiding officer, Hon. Nova Echavez, Hon. Conie Lim, Hon. Matronillo Cartajenas, Hon. Girlet Luansing, Hon. Cecelia Mabanag, Hon. Dodong Saquin, Hon. Rustom Parojinog ug Hon. Bobby Jimenez.
( Nanding G. Dumanjug, Office of the Vice Mayor)