Sangguniang Panglungsod Mibalaod sa Code of Economic Enterprise

Sangguniang Panglungsod Mibalaod sa Code of Economic Enterprise

Hingpit nang gihimong balaod sa Sangguniang Panglungsod (SP) sa Dakbayan sa Ozamiz ang Code of Economic Enterprise (CEE) pinaagi sa pagpalabang niini sa ikatulo ug kataposang pagbasa atol sa regular session sa konseho niadtong Lunes human niduso ug nipadayag og oral report si konsehal Romeo “Bobby” Jimenez, Chairman Committee on Public Market and Slaughter House gumikan sa pagkadinalian niini nga mapasar sa lokal nga lehislatura.

Kini nunot sa tinguha ni Vice Mayor Carlos “Kaloy Patricio Cruz Bernad nga kinahanglan nga magsubay sa husto nga proseso ang pagbalaod sa maong ordinansa taliwala sa kaapiki sa panahon nga nag-apora sa mga magbabalaod ning siyudad nga kinahanglan nga maaprobhan kini aron buksan sa kinatibuk-an ang operasyon sa Ozamiz City Public Mall, mokita ug ibayad sa principal ug interest sa loan alang sa pagpatuman sa nahisgutang proyekto.

Nipasar sa unang pagbasa ang ordinansa sa regular session niadtong Enero 26, gisundan gilayon sa hearing sa Committee of the Whole sa petsa 27 ug Pebrero 2, public hearings Pebrero 4 ug 11.

Human gisalikway sa mga stallholders ang orihinal nga sugyot kantidad sa abangan ug ang sugyot ni Mayor Reynaldo “Aldong” O. Parojinog nga kunhoran og 50 porsento ang rata sa ilang balayranan, usa ka kawkus tali sa mayor,besi mayor ug mga sakop sa konseho ang gipahigayon aron tun-an pag-ayo ang counter-proposal sa mga stallholders.

Basi sa section 3 kun Policy Statement gipasabot niini nga tumong sa pagtukod og Public Mall ug pagpalig-on sa maong ordinansa nga mahimong mobarog ang siyudad sa iyang kaugalingong pagpaningkamot pinaagi sa pagtukod og economic enterprises nga maghatag og kahigayonan nga muomento ang katilingbanon-ekonomikanhong bahin sa mga lomolopyo, mapalambo ang panalapi ug muoswag ang maayong panggoberno.

Kini nga balaod-lokal maoy sukaranan sa pagpadagan sa tanang economic enterprises sa siyudad.

Ang ordinansa gibalaod sa regular session niadtong Lunes nga gidumala ni Konsehal Taryn Mecaros isip Presiding Officer, Hon. Simplicia O. Neri, Nova Princess P. Echavez ,Bobby Jimenez, Cecelia Mabanag, Irene “Girlet” Luangsing, Fortunato “Dongdong” Saquin,

Subay sa section 89 sa ordinansa, kini ipatuman gilayon human sa 15 ka adlaw nga pagmantala. (Nanding/George)