P4 minimum nga pletihansa pedicab ningpit nang gibalaod sa Konseho

P4 minimum nga pletihansa pedicab ningpit nang gibalaod sa Konseho

Hiniusang giuyonan sa mga sakop sa Sangguniang Panglungsod sa ika tulo ug kataposang pagbasa ang ordinansa nga nagpaumento sa minimum nga pletihan sa pedicab sa dakbayan sa Ozamiz.

Sa regular session niadtong Lunes nga gidumala ni Vice Mayor Kaloy Bernad, niduso si konsehal Bobby Jemeniz, Chairman, Committee on Public Utility og hiniusang motion alang sa ikatulo ug kataposang pagbasa sa ordinansa nga nag-amenda sa section 1 City Ordinance 1003-05.

Kini nagpasabot nga mokabat na sa P 4.00 ang minimum nga pletihan sa mga pedicab ning siyudad gikan sa kanhi P 3.00. Apan sa dili pa ipatuman ang mao nga kausaban kinahanglan nga imantala una kini sa pamantalaan nga may egong sirkulasyon aron masayod ang publiko ug masunod ang gingbut-an sa balaod.

Gipalig-on sa konseho ang maong ordinansa human giresolba ang mga issues sama sa kolorum nga mga pedicab nga nagdagan sa Ozamiz, tigmaniho sa pedicab nga walay lisensiya, mamili og pasahero, mosita og subra nga pletihan ug kahindik sa tigmaniho.

Subay niini nagkauyon ang mga sakop sa konseho nga ilang bakwion ang ordinansa nga nagtugot sa peso nga umento sa pletihan kon ugaling magpabilin sa gihapon ang dili maayo nga kinaiya sa mga tigmaniho sa pedicab nga gamot hinungdan sa mga isyus nga nahisgutan sa unahan.

Aron molig-on ang pagpatuman sa ordinansa , himuon usab ang subsub nga pagpanakop sa mga makasupak niini.

Gipahayag ni Vice mayor Bernad nga ilang gipalabang ang ordinansa gumikan kay ilang nakita nga makatarunganon alang samga pedicab drivers nga kusog ang gigamit sa pagpadagan sa ilang sakyanan ug dasun pa niini walay nagpakitag pagsupak sa gipahigayon nga public hearings.

Kahinumduman nga nagpapatawag og public hearing ang konseho kaniadtong Mayo 27 ug Hunyo 1 tuig 2009 ug sa maong tigom walay nagpadayag og pagsupak. (Nanding G. Dumanjug,Office of the Vice Mayor)