OPEN ACCESS AND RETAIL COMPETITION PAGBALIGYA SA KORYENTE MAKAAYO SA KATAWHAN

OPEN ACCESS AND RETAIL COMPETITION PAGBALIGYA SA KORYENTE MAKAAYO SA KATAWHAN

Nagtuo si Vice Mayor Kaloy Bernad nga adunay positibong epekto ngadto sa katawhan ilabina sa lalawigan sa Misamis Occidental ang pagpatuman sa Open Access and Retail Competition sa gahum sa elektrisidad.

Gipadayag sa besi mayor nga posibling adunay musulod sa lalawigan nga mga dagkong investors aron magnegosyo ug moserbisyo sa publiko pinaagi sa pag distribute og gahum sa elektrisidad sama sa kaulohan ug kabisay-an nga diin nagnegosyo ug nagserbisyo sa power industry ang banayng Lopez ug Aboitez.

Iyang giingon nga kini nga polisiya sa kagamhan dakong hagit sa Misamis Occidental Electric Cooperative nga palambuon ang kalidad sa ilang serbisyo aron mopatigbabaw batok sa lagmit higpit nga kompetesyon sa negosyo.

Dako ang posibilidad nga moepekto sa prisyo sa koryenti ang higpit nga kompetisyon subay sa open access and retail competiton sa power industry kini gumikan kay ang 69 KV Generation Line sa National Power Corporation ug uban pan pang generation line sa korporasyon nga iya sa goberno tibuok nasod mahimong bukas alang sa bisan kinsang interesadong indibidwal o grupo sa mga negosyanti nga mopalit og koryenti gikan niini nga generation line sa NPC aron ibaligya ngadto sa mga end users nga naglangkob sa mga yanong konsumanti ug mga balay patigayon.

Una nang gipasabot ni Diosdado Corsiga, OIC, Training and Development Division sa National Elecrification Administration (NEA) atol sa gipahigayon nga Multi Sectoral Electrification Advisory Counsel (MSEAC) Seminar sa Johans Cuisine nga kinahanglan nga mangandam MOELCI alang sa higpit nga competition gumikan kay ipatuman na sayo sa tuig 2010 ang Open Acess and Retail Competition.

Hinuon dili pa masiguro kon ang pagpatuman sa nasangpit nga polisiya nga nagsukad sa prinsipyo sa kompetisyon makahatag gyud og kaayohan sa katawhan gumikan kay kinahanglan usab ang dason nga lakang araon malikayan ang cartel sa pagbaligya sa koryenti nga maoy muguba sa benepesyo alang sa katawhan resulta sa higpit nga kompetesyon.

Ang Open Access and Retail Competition maoy tipik ug bahin sa Privatization policy sa kagamhanan.
( Nanding Dumanjug)