Reunion buhi nga Tradisyon sa Misamisnon

Reunion buhi nga Tradisyon sa Misamisnon

Tradisyon sa panagtigom o reunion sa pamilya buhi nga kinaiya sa Misamisnon panahon sa pagsaulog sa pasko.

Gipahayag ni Vice Mayor Kaloy Bernad nga kini nga tradisyon dayag kayo pinaagi sa pagpahigayon og mga clan reunions sa mga pamilya nga giisip nga usa ka paagi alang sa dogang nga pagpalig-on sa relasyon sa sakop sa kabanayan, panaghiusa , pag-inambitay , pagtinabangay alang sa kaayohan sa mga sakop sa kabanayan.

Busa sa mga clan reunions nga siya ang mahimong dinapit nga bisita iyang gipasalamatan ug gidayeg ang mga kadagkoan ug mga sakop sa kabanayan gumikan sa gihimo nga pagpaningkamot nga magpabiling buhi ang nahisgutang tradisyon.

Kini usa ka buhing tilimad-on nga naghatag og dakong kahulogan sa pagsaulog sa pasko sa pagkatawo sa atong Ginoo gumikan nga ang maong mithi nasubay man sa maayong pagtulon-an nga naghatag og dakong bili sa kaumolan sa pamilya nga giisip nga institusyon sosyal nga dugokan sa kalig-on sa katilingban ug panggoberno, dogang pagpasabot sa besi mayor.

Ang besi mayor nagtuo nga ang kalig-on sa kabanayang Misamisnon nga nabug-os sa mga maayong mithi mahimong dalan sa husto, hiniusang kusgan nga hukom sa pamilya bisan pa sa panahon sa piniliay alang sa pagpili sa hustong kandidato sa nagkalain laing posisyon sa goberno.

Ang kabanayan maoy maghatag og maayong deriksyon sa mga sakop niini sa paghukom panahon sa piniliay aron makapili og maayong kandidato ug pinaagi niini ang mga pamilya dakog tabang alang sa pagpabarog og usa ka maayong panggoberno.
(Nanding G. Dumanjug, Office of the Vice Mayor)