Kaepektibo sa barangay kanunayng gikonsiderahan sa Sangguniang Panglungsod

Kaepektibo sa barangay kanunayng gikonsiderahan sa Sangguniang Panglungsod

Gipahayag ni Vice Mayor Kaloy Bernad nga kanunayng gikonsidera sa Sangguniang Panglungsod ang malahutayong nga pagkaepektibo sa 51 ka mga barangay ning siyudad.

Kini ang nag-unang rason nga giila ug gihatagan og dakong importansiya sa konseho nga maaprobahan sa labing dali nga panahon ang iduso nga mga sugyot gahin, resolution ug ordinansa gikan sa mga barangay isip local government units nga sakop sa kagamhanang lokal sa Ozamiz.

Gipasabot sa Besi Mayor nga ihiklin gilayon sa konseho ang internal rules, gikan sa first reading ilahos ngadto sa third and final reading ang mga proposed budgets, ordinansa ug resolution gawas lang kun may legal ug technical questions.

Alang kang Bernad ug sa tanang sakop sa Sangguniang Panglungsod, bahandianon kaayo ang panahon pinaagi sa dali nga pagpasar sa mga duso-sugyot gikan sa mga barangay aron madali ang ilang pagtubag sa mga panginahanglan sa ilang katawhan.

Ang budget sa barangay kada tuig nakahan-ay niini ang tanan nga mga proyekto, programa, ug kalihukan nga nagtumong ang paghatod sa mga batakang serbisyo sa goberno sa barangay samtang ang resolution ug ordinansa, aksiyon sa konseho sa barangay aron mapadali ang paghatod og serbisyo ug ingon man mapatuman ang balaod nga maghatag og proteksiyon sa kinabuhi ug kabtangan sa mga lomolopyo niini.

Basi sa local government code ang tanang naaprobahan nga resolution, ordinansa ug budget sa barangay kinahanglan nga repasuhon (review) sa sangguniang bayan o panglungsod aron masiguro nga kini natukma sa mga lagda ug makabat-ot ang tumong ug tinguha. Busa kinahanglan nga aksiyonan gilayon sa konseho pinaagi sa regular o special sessions, dogang pagpasabot sa besi mayor.
(Nanding &George, Office of the Vice Mayor)