Konseho kanunayng andam sa pagtubag sa dinaliang panginahanglan atol sa kalamidad

Konseho kanunayng andam sa pagtubag sa dinaliang panginahanglan atol sa kalamidad

Gipahayag ni Vice Mayor Bernad nga andam ug maningkamot ang konseho ning siyudad nga makatubag sa dinaliang panginahanglan sa higayon nga adunay mahitabo nga kalamidad.

Gawas sa makanunayong pagtubag sa sangguniang panglungsod sa higayon nga may mahitabo nga sunog, dali usab nga giaksiyonan niini ang dinaliang panginahanglan sa mga biktima sa unos ug dagkong balod sa kabaybayonan.

Kahinumdoman nga kaniadtong Enero 16, 2009 gipalig-on sa Sangguniang Panglungsod ang Resolution Numero 08-09 nga nagdeklara sa Purok 6, 8, 8A sa Barangay Carmen Annex; Purok 2,6,12 Catadman ug Purok 3,5 sa Baybay Triunfo isip calamity areas human naigo sa unos ug dagkong mga balod kaniadtong Enero 14 ug 15 tuig 2009.

Tumong niini nga mapagawas sa labing dali nga panahon ang kantidad gikan sa calamity fund aron katabangan ang mga pamilya sa maong dapit nga makapabarog sa ilang mga balay nga gipayhag sa kusog nga hangin ug paghapak sa dagkong balod.

Gipahayag sa Besi Mayor nga makadaghan nang higayon nga may mibutho nga kalamidad sa siyudad , apan gumikan sa pagtinabangay sa buhatan sa Mayor, Sangguniang Panglungsod, City Emergency Assistance Group (CERT), City Social Welfare and Development, Philippine National Police, Bureau of Fire Protection, barangay Officials, CVOS, BHW, pribadong sector ug uban pa, nahimong dali ug sayon ang pagtubag sa dinalilang tabang nga nakaluwas sa mga kinabuhi ug kabtangan sa katawhan sa siyudad.
(Nanding & George, Office the Vice Mayor)