PROTEKSIYON, KAUGMAON SA KABATAAN TULOBAGON SA MGA GINIKANAN UG KAGAMHANAN

PROTEKSIYON, KAUGMAON SA KABATAAN TULOBAGON SA MGA GINIKANAN UG KAGAMHANAN

Proteksiyon ug kaugmaon sa kabataan tulobagon sa mga ginikanan ug sa kagamhanan.

Kini ang kusganong gipasabot ni Ozamiz City CSWD Officer Ludy Raras agig mensahe panahon sa pagsaulog sa National Children’s Month.

Iyang gipadayag nga kon unsa man ang dangatan sa kabataan, gawas sa ginikanan, adunay tulobagon niini ang mga opisyal sa kagamhanan gikan sa barangay, munisipalidad, siyudad, probinsiya ug sa nasud.

Sa gipahigayon nga Daycare Variety Show sa Timoteo Uy Mulitipurpose Hall, Carmen Annex ning siyudad, gipasayon sa mga opisyal sa nahisgutan nga barangay sa pagpangulo ni Brgy. Chairman Pablita Manda, susamang gipasabot ni Konsehal Cecelia Mabanag ug Konsehal Loloy Cartajenas ang kabahandianon sa kabataan diha sa katilingban ug kinahanglan nga atimanon aron dili mamahimong problema sa katilingban.

Samtang gipaambit usab ni Vice Mayor Kaloy Bernad ang iyang mensahe sa kasaulogan sa National Children’s Month nga ang kabataan mao ang bahandi ug kaugmaon sa siyudad kinsa sa umaabot na panahon kuhaon gikan kanila ang mamahimong pangulo sa atong dakbayan, professionals nga maghatag ug serbisyo sa katawhan o sakop sa nagkalain-laing sector nga naghatag og maayong serbisyo og nagmogna og produksiyon alang sa katawhan.

Gumikan niini mismo ang batakang balaod sa nasod niila sa tampo sa kabataan alang sa pagpalambo sa nasod busa gitahasan ang estado sa pagpanalipod kanila ug pagpalambo sa ilang pisikal, moral, spiritual na panghunahuna ug pamatasan aron sa umaabot damlag mahimong responsableng sakop sa kaitlingban. Dugang pa niini nagmugna ang kongreso ug balaod Akta Republika 7610, ang balaod nga nanalipod sa kabataan ug uban pang statutory laws.

Busa kinahanglan nga panalipdan, palambuon ug siguruhon ang kaugmaon sa kabataan, dugang pamahayag sa besi mayor.
(Nanding G. Dumanjug, Offfice of the Vice Mayor)