Supporters supak nga moatras sa kandidatura si Vice Mayor Kaloy Bernad

Supporters supak nga moatras sa kandidatura si Vice Mayor Kaloy Bernad

Supporters ni Vice Mayor Kaloy Bernad supak kon moatras sa iyang kandidatura sa pagkagobernador sa Misamis Occidental.

Gipadayag sa mga supporters sa besi mayor nga lagmit masaypan nga napalit o walay prinsipyo ang besi mayor nga makadaot sa kaugmaon niini sa politika kon ugaling iatras ang iyang kandidatura sa pagkagobernador sa lalawigan.

Kini ang gipagawas nga reaction sa taga suporta human masayran nga adunay naghangyo kaniya nga iatras ang iyang kandidatura sa pagkagobernador og modagan na lang pagkabesi gobernador samtang aduna pay pipila ka oras ang nahibilin alang sa pagduso sa sertipiko de kandidatura sa buot mokandidato.

Gipasabot sa besi mayor nga dili na gyud maosab pa ang iyang hukom sa pagdagan pagka gobernador, kamatuoran niini nakaduso na siya sa iyang sertipiko de kandidatura Domingo madugay na.

Dako ang kalagmitan nga mobiya kaniya ang iyang taga suporta kon ugaling iyang iatras ang kandidatura sa pagkagobernador ug mahimong dakong kibhang sa iyang puwersa gumikan kay sila ang usa sa naghatag og kusog ug kalig-on sa iyang hukom.

Kahinumduman nga opisyal nga nedeklara ang besi mayor sa iyang kandidatura adlawng Lunes human sa regular session sa konseho ug gipamatud-an ang pagkasensiro sa tumong pinaagi sa pagduso sa iyang sertipiko de kandidatura.

Gipasabot sa besi mayor nga ang pagduso sa iyang coc maoy motapos sa mga pagduda nga milusad siya sa iyang kandidatura aron magpapalit sa iyang kaatbang sa politika.

Ang iyang katakus isip usa ka license chemical engineer, executive, legislative, vice mayor , negosyante ug isip usa ka mag-uuma, maoy mopahaw-as sa lalawigan gikan sa kawad-on ilabina nga dako gyud ang posibilidad nga si Senadur Noynoy Aquino ang modaog nga kandidato sa pagkapresidenti ug senadur Mar Roxas pagkabesi presidenti sa liberal party sa piniliay sa tuig 2010.

Siya isip provincial chairman sa Liberal Party sa lalawigan kon ugaling suwertihon sa election sa pagkagobernador , sama nga usa lamang ka tikang ang Malacañang sa Misamis Occidental nga mohatod sa dakong kalamboan.
(Nanding G. Dumanjug.office of the Vice mayor)