Luwas nga pagtugpa ug paglupad sa eroplano prayoridad sa Konseho

Luwas nga pagtugpa ug paglupad sa eroplano prayoridad sa Konseho

Luwas nga pagtugpa ug paglupad sa eroplano sa Ozamiz City Airport usa sa gihatagan og prayoridad sa Sangguniang Panglungsod.

Gipasabot ni Vice Mayor Kaloy Bernad nga duha ka impotanteng butang ang gikonsiderahan sa konseho, una ang luwas nga pagsakay sa mga pasahero ug ekonomikanhong kahimtang sa siyudad , lalawigan ug kanait nga dapit.

Ang Committee on Laws, chaired by Honorable City Councilor Irene Luansing Jr. ug ang mga sakop niini nga sila si konsehal Tryn Mecaros, Bebie Neri, Bobby Jiminez ug Rustom “Loloy” Parojinog nagpahigayon og committee hearing niadtong Huwebes sa ordinansa nga naglatid sa lagda ug reglamento alang sa luwas nga paglupad ug pagtugpa sa eroplano sa Airport ning siyudad.

Sa hearing nahimong usa sa seryusong gihisgutan ang sugyot nga unod sa maong ordinansa nga hingpit nga idili ang pagpalupad og tabanog sa gilay-on nga sieti kilometros gikan sa airport o idili gyud sa tibuok siyudad.

Sa nasangpit nga pagdungog gipasabot ni Ozamiz City Air Transportation Office Manager Napoleon “Nap” Bail nga mas maayo ipatuman sa siyudad ang pangkinatibuk-an nga pagdili kun total ban sa pagpalupad og tabanog gumikan kay naghatag kini og karisko sa eroplano.

Samtang misugyot usab ni Mecaros nga I regulate lang ang pagpalupad og tabanog pinaagi sa pagkutop sa gitas-on sa nylon nga gamiton, gidogayon ug ang piho nga bulan ug dapit sa pagpalupad.

Dogang gihisgutan ang plano nga pagdili og pagbuhi og mga langgam sama sa salampati sa musunod nga barangay; Labo,Gango,Bacolod ug Molicay aron malikayan nga mahigop sa makina sa eroplano nga moresulta sa paghunong sa andar niini ug mosangpot sa gikahadlokang trahedya.

Gumikan niini gihangyo ni Luansing si Bail nga kuhaon ang hunahuna sa mga piloto sa mga importanting probisyon sa ordinansa ug ipahigayon ang public hearing sa labing dali nga panahon ilabina nga ang sugyot ordinansa mopahamtang og silot sa ni bisan kinsang mapamatud-an nga makalapas.
(Fernando G. Dumanjug, Office of the Vice Mayor)