Hangyo sa motorcab drivers and operators, ilakip sa agenda sa konseho

Hangyo sa motorcab drivers and operators, ilakip sa agenda sa konseho

Hangyo sa motorcab drivers and operators alang sa pagpaumento sa plitihan giplastar sa milabayng Regular Session sa Sangguniang Panglungsod niadtong Lunes Hulyo 27, 2009.

Si Vice Mayor Kaloy Bernad nitakda sa maong panahon atol sa regular session sa konseho nga gisuportahan sa tanang sakop niini.

Napasabot sa besi mayor nga kinahanglan nga malakip sa agenda ang maong hangyo aron matun-an sa mga sakop sa konseho kon pila gyud ang tukmang kantidad alang sa pagpaumento sa minimum nga plitihan sa mga motorcab niining siyudad.

Samtang napahayag usab ni konsehal Loloy Cartajenas, chairman Committee on Appropriation nga angayan nga mopagawas og hukom ang Sangguniang Panglungsod sa unang hangyo sa mga motrocab drivers and operators alang sa pagpataas og usa ka peso sa minimum nga pletihan sa mga motorcabs gumikan sa pagtaas sa prisyo sa gasolina ug ang pag-umento sa prisyo sa mga pyesa. Gawas pa niini gipasabot usab ni Cartajenas nga kon gihatagan og pagtugot sa konseho ang pagpataas sa plitihan sa mga pedicabs susama usab nga pagtugot ang ihatag ngadto sa motorcabs kay kini nagamit og gasolina.

Sa kabahin ni Konsehal Bobby Jimenez, Chairman Committee on Public Utility, iyang gipasabot nga kinahanglan nga tun-an pag-ayo ang tukmang kantidad sa gipangayo nga umento sa plitihan sa motorcab gumikan kay sa unang pagtakda sa konseho sa P6 pesos nga minimum motorcab fare, mokabat sa tag 46 pesos ang prisyo matag litro sa gasolina.

Kahinumdoman nga kaniadtong tuig 2008, napasar na sa committee level ang sugyot ordinansa nga mitakda og P7 pesos nga minimum nga plitihan sa motorcabs apan kasamtangang gihiklin sa konseho sa dihang kalit nga nikunhod ang prisyo sa gasolina.

Apan ning panahona nga miumento na usab ang prisyo sa gasolineaog kapin sa P40 pesos tinguha sa motorcab drivers and operators nga mapatuman ang nahiklin nga sugyot ordinansa nga nagtakda sa P7 pesos nga minimum nga plitihan sa motorcabs.

Ang ilang hangyo gipadayag pinaagi sa pagpadangat og sulat ngadto sa konseho ug linawas nga pagpadayag atol sa regular session nga sa pinaagi usab sa ilang tigpamaba nga si Reniel Jonem.
(Nanding G. Dumanjug, Office of the Vice Mayor)