Kooperatiba naghatag gahum sa katawhan batok sa kawad-on

Kooperatiba naghatag gahum sa katawhan batok sa kawad-on

Kooperatiba naghatag og gahum sa katawhan sa pagpakigbugno sa kapobrihon sa Misamis Occidental.

Gipahayag ni Ozamiz City Vice Mayor Kaloy Bernad nga iyang nakita ang “vital role’ sa mga kooperatiba sa lalawigan human gibutyag ni Cooperative Development Authority (CDA) Region 10 , Regional Director Orlando R. Ravanera nga mokabat sa P553.7 millions ang gibobo niini nga capital nga nakamogna ug mga panginabuhi ug panarbaho sa katawhan.

Sa report sa Philippine Information Agency (PIA) Cagayan de Oro City, Region pinaagi ni Ruchie Cabahug Aguhob gibutyag ni Regional Director Ravanera nga basi sa data sa tuig 2006 may kinatibuk-an nga P24.156 bilyones ang nabuhian nga capital investments sa mga kooperatiba sa Mindanao gikan niini nga kantidad mokabat usab sa P8.31 bilyones sa Northern Mindanao nga naglangkob sa Misamis Occidental P553.7 milyones, Lanao del Norte P528.2 milyones, Misamis Oriental P5.39 bilyones, Bukidnon P1.77 bilyones ug Camiguin P 72.7 milyones.

Gipasabot sa besi mayor ang kooperatiba ekonomikanhong kusog sa mga kabus gumikan kay pinaagi sa panaghiusa sa ginagmay nga kantidad, kahago, kahibalo, kahanas sa mga membro niini makamogna og panginabuhi, serbisyo ug produkto nga ginahanglan nga mabuhi ang tawo ug pinaagi usab niini mapalambo ang katilingbanon nga bahin sa komonidad nga gimogna sa kooperatiba kun “cooperative community”.

Ang dakbayan sa Ozamiz diin maoy labing dako nga siyudad lalawigan sa derikta ug inderekta nga pamaagi nilahutay ug napaasdang ang ekonomikanhong kahimtang ilabina sa banikanhong sector sama sa mag-uuma, mangingisda, kababayne-an, kawani sa pribado ug goberno, sector sa mga professionals ingon man gagmayng magpapatigayon, sector sa transportasyon, media ug uban pa kini pinaagi sa kooperatiba.

Kamatuoran niini adunay nga milyonaryong kooperatiba ning siyudad ug nalain laing dapit sa Misamis Occidental nga nagnegosyo isip usa ka bangko nga makakompentinsiya sa mga pribadong bangko gumikan sa daghang serbisyo nga gitanyag niini ngadto sa katawhan.

Gidogang sa besi mayor nga mas molig-on ang ekonomikanhong gahum sa pobring katawhan kon padayong suportahan sa kagamhanan ang mga kooperatiba, ilabina nga ang lalawigan sa Misamis Occidental usa sa mga probensiya sa nasod nga giilang labing kabus.
(Nanding G. Dumanjug, Office of the Vice Mayor)