Pagtaas sa nagparehistro, pagsaka sa politikanhong pagpakabana

Pagtaas sa nagparehistro, pagsaka sa politikanhong pagpakabana

Pagtaas sa gidaghanon sa mga nagparehestrong botante sa dakbayan sa Ozamiz nagtimaan sa pagsaka sa politikanhong pagpakabana.

Gipahayag ni Vice Mayor Kaloy Bernad nga kini usa ka timailhan nga daghang katawhan ning siyudad ang nangandam nga mogamit sa ilang gahum alang sa pagmogna og usa ka maayong panggoberno pinaagi sa pagamit sa ilang batakang katungod sa pagbotar sa hustong kandidato.

Kini gipadayag sa besi mayor human masayri nga mokapin sa 70 mil ka mga botante ang kinatibuk-ang nagparehestro sa buhatan sa COMELEC nga naaglangkob sa mga batan-on nga nagpangidaron og 18 anyos pataas, hamtong ug idaran.

Niadtong bulan sa Septembri ning tuiga ang kinatibuk-ang botanti nga narehistro moabot sa 67,356 ug padayon ang pag-umento niini hantod sa Nobeyembri 3, ang gitakda nga lugway kun extension pagpangrehistro sa mga botante.

Niadtong nakalabayng eleksiyon ang siyudad may kinatibuk-ang 62,814 ka mga botante.

Ang rehestradong botante nagagikan sa 51 ka mga barangay ning siyudad nga may kinatibuk-ang 528 ka mga presingto nga kabahin niini ang 132 ka clustered precincts.

Gipasabot ni Vice Mayor Bernad nga ang gahum sa pagbotar sa kapin sa 70 mil ka mga botante sa Ozamiz maoy mohukom sa kaogmaon sa siyudad o sa probinsiya sa musunod nga mga tuig.


Subay niini gipahumduman sa besi mayor ang mga botante sa kabahandianon sa ilang gahum sa pagbotar ug gamiton gyud kini sa husto inay ibaliwala lamang ug ibaligya sa mga kandidato nga mamalit og mga botante.

Gidogang sa besi mayor nga makadaghan nang higayon nga gihatagan og kahigayonan ang katawhan sa hustong pagamit sa ilang gahum apan makadaghan usab kini nagkulang sa hustong pagamit busa hinay ang paglambo sa nasod.
(Nanding Dumanjug, Office of the Vice Mayor).